Imran-Khan-PTI

40 ہزاربچے صرف گندگی کی وجہ سے ہرسال مرتے ہیں

اسلام آباد: وزیراعظم عمران خان کا کہنا ہے کہ 40 ہزاربچے صرف گندگی کی وجہ سے ہرسال مرتے ہیں.

گرین اینڈ کلین پاکستان مہم کی افتتاحی تقریب سے وزیراعظم عمران خان نے خطاب میں کہا کہ عوام کے تعاون کے بغیرکوئی حکومت مسائل حل نہیں کرسکتی، کچی آبادیوں میں گندگی کے ڈھیرہیں، صاف پانی کے چشمے اب سیوریج کے نالے بن چکے ہیں، کراچی اور کوئٹہ میں پانی کی کمی کا مسئلہ ہے جب کہ دنیا بھرمیں پانی ری سائیکل کیا جاتا ہے۔

وزیراعظم عمران خان نے کہا کہ ہر بڑے کام کا پہلے تصور بنتا ہے، اگرہم سب عزم کرلیں تو سب کچھ ٹھیک ہوسکتا ہے، اپنے بچوں کو ماحولیات اورصفائی سے آگاہ کرنا ہے، بچوں کو بتائیں گے کہ ملک کو صاف رکھنا کتنا ضروری ہے، صفائی مہم میں تحصیل کی سطح پرمقابلہ کرایا جائے گا جب کہ صفائی مہم میں حکومت، مسول سوسائٹی، طلبہ سب شریک ہوں گے۔

وزیراعظم عمران خان نے کہا کہ امید ہے کہ جیسے جیسے صفائی ہوگی مہم بڑھتی جائے گی، گرین اورکلین پاکستان مہم کے ایمبسڈر بھی بنائے جائیں گے، پٹرول پمپس اورسی این جی اسٹیشنز کو بیت الخلا صاف رکھنے کی ہدایت کردی گئی جب کہ علماءسے درخواست کرینگے کہ جمعہ کو مساجد سے صفائی کیلیے اپیل کریں۔

وزیراعظم نے کہا کہ صرف 42 فیصد پاکستانیوں کے پاس بیت الخلا کی سہولت ہے، 2023 تک ملک میں بیت الخلا کی کمی کو پورا کریں گے، صفائی مہم کی نگرانی کرنے کے لیے نوجوانوں کو نوکریاں بھی مہیا کریں گے جب کہ بیت الخلا صاف نہ رکھنے والے گھروں کوجرمانہ کیا جائے گا۔

40 ہزاربچے صرف گندگی کی وجہ سے ہرسال مرتے ہیں” ایک تبصرہ

اپنا تبصرہ بھیجیں