افغانستان میں نیٹو کے قافلے پر بم حملے میں 3 امریکی فوجی ہلاک

کابل: افغانستان میں بم دھماکے کے نتیجے میں 3 امریکی فوجی ہلاک اور 3 زخمی ہوگئے۔

بین الاقوامی خبر رساں ادارے کے مطابق افغانستان کے صوبے غزنی کے وسطی شہر میں سڑک کنارے نصب بم زوردار دھماکے سے پھٹ گیا جس کے نتیجے میں قریب سے گزرنے والے امریکی فوجی قافلے میں شامل 3 امریکی فوجی اہلکار ہلاک ہوگئے جب کہ امریکی کنٹریکٹر سمیت مزید 3 امریکی اہلکار شدید زخمی ہوگئے۔

نیٹو کے سربراہی میں قائم امدادی مشن کی جانب سے جاری کردہ بیان میں امریکی فوجی اہلکاروں کی ہلاکت کی تصدیق کرتے ہوئے کہا گیا ہے کہ سڑک پر نصب دیسی ساختہ ریموٹ کنٹرول ڈیوائس بم سے فوجی قافلے کو نشانہ بنایا گیا۔ ہلاک اور زخمی ہونے والوں کو ہیلی کاپٹر کے ذریعے اسپتال منتقل کردیا گیا ہے۔

افغانستان کے صوبے غزنی میں طالبان جنگجوؤں نے گھمسان کی جنگ کے بعد قبضہ حاصل کرلیا تھا اور مرکزی چوکیوں پر طالبان تعینات تھے۔ غزنی سے طالبان کا قبضہ واگزار کرانے کے لیے امریکی فوجی اہلکاروں کا دستہ متحرک تھا۔ ہلاک ہونے والے امریکی فوجی اسی خصوصی دستے کے اہلکار تھے۔

واضح رہے کہ گزشتہ تین ماہ سے افغانستان میں طالبان حملوں میں اضافہ ہوگیا ہے اور غزنی و بلخ صوبوں سمیت کئی علاقوں پر طالبان نے قبضہ حاصل کرلیا ہے۔

اپنا تبصرہ بھیجیں