سیاسی انتقام کی خاطر کمرے سے اے سی اتارنا نواز شریف کی جان پر حملہ ہے، شہباز شریف

اسلام آباد: مسلم لیگ (ن) کے صدر اور قومی اسمبلی میں قائد حزب اختلاف شہباز شریف نے جیل میں نواز شریف کے کمرے سے اے سی اتارنے کے معاملے پر چیف سیکریٹری کو خط لکھا ہے جس میں انہوں نے کہا ہے کہ سیاسی انتقام کی خاطر کمرے سے اے سی اتارنا نواز شریف کی جان پر حملہ ہے۔

جیل میں نواز شریف کے کمرے سے اے سی اتارنے کے معاملے پر شہباز شریف نے چیف سیکریٹری کو خط لکھا ہے۔ جس کی نقول چیف جسٹس پاکستان، چیف جسٹس لاہور ہائی کورٹ، ایڈیشنل چیف سیکریٹری داخلہ پنجاب اور آئی جی جیل خانہ جات کو بھی بھیجی گئی ہیں۔

خط میں کہا گیا ہے کہ پنجاب حکومت نے آئی جی جیل خانہ جات کو 17 جولائی کو خط لکھ کر نواز شریف کے کمرے سے اے سی اتارنے کی ہدایت کی ہے جس کے مطابق یہ اقدام وزیراعظم کے حکم پر کیا جا رہا ہے۔

شہباز شریف نے خط میں کہا کہ اس سلسلے میں آپ کی توجہ پنجاب حکومت کے تشکیل کردہ بورڈ کی سفارشات کی جانب مبذول کرانا چاہتا ہوں کیونکہ بورڈ کی سب سے پہلی سفارشی یہی ہے کہ نواز شریف کو مناسب درجہ حرارت والے کمرے میں رکھا جائے، ایسا نہ کرنے سے ان کے گردے کام کرنا چھوڑ سکتے ہیں۔

خط میں شہباز شریف نے کہا کہ محکمہ داخلہ کی سرد مہری پر حیران ہوں کہ نواز شریف کی صحت سے متعلق کلیدی نکتہ کو کیسے نظر انداز کر دیا گیا۔ ان کے کمرے سے اے سی اتارنے کا مطلب میڈیکل بورڈ کی سفارشات کی خلاف ورزی ہے، میڈیکل بورڈ کی سفارشات پر ان کی روح کے مطابق عمل کیا جائے کیونکہ سیاسی انتقام کی خاطر یہ اقدام نواز شریف کی جان پر حملہ ہے۔ 3 مرتبہ کے منتخب وزیر اعظم کو سیاسی دباؤ کی بناء پر ان کے قانونی اور جائز حقوق سے محروم نہ کیا جائے۔

اشتہار


اس خبر پر اپنی رائے کا اظہار کریں

اپنا تبصرہ بھیجیں