کورونا لاک ڈاؤن کے باعث بھارت میں پھنسے 176 پاکستانی کل واپس آئیں گے

کورونا وائرس کے پیش نظر لاک ڈاؤن کی وجہ سے بھارت میں پھنسے 176 پاکستانی کل (بدھ) اٹاری ۔ واہگہ بارڈر کے ذریعے واپس لوٹیں گے۔

دفتر خارجہ سے جاری بیان کے مطابق یہ پاکستانی بھارت کی مختلف ریاستوں چھتیس گڑھ، گجرات، مدھیا پردیش، مہاراشٹرا، پنجاب، راجستھان، اتر پردیش، اترکھنڈ اور دہلی میں لاک ڈاؤن میں توسیع اور کورونا وائرس کے باعث اٹاری ۔ واہگہ بارڈر کی بندش کی وجہ سے وہاں پھنسے ہوئے ہیں۔

بیان میں کہا گیا کہ وزیر اعظم عمران خان کی ہدایات کے مطابق نئی دہلی میں پاکستانی ہائی کمیشن ان ہم وطنوں کی بحفاظت وطن واپسی کے لیے بھارتی حکام سے مسلسل رابطے میں تھا، جبکہ دفتر خارجہ پاکستان میں حکام کو اس حوالے سے پیشرفت سے مسلسل آگاہی فراہم کر رہا تھا۔

پاکستانی ہائی کمیشن نے ان پاکستانیوں کو لاک ڈاؤن کے باعث 20 مختلف شہروں سے اٹاری پہنچانے کے لیے سفری سہولیات کا انتظام بھی کیا۔

دفتر خارجہ کا کہنا تھا کہ رواں سال 20 مارچ سے اب تک بھارت میں پھنسے 400 سے زائد پاکستانی وطن واپس پہنچ چکے ہیں۔

واضح رہے کہ 5 مئی کو بھارت میں پھنسے 193 پاکستانی اٹاری ۔ واہگہ بارڈر کے ذریعے وطن لوٹے تھے۔

نئی دہلی میں پاکستانی ہائی کمیشن کے مطابق یہ پاکستانی اپنے پیاروں سے ملنے، زیارت یا علاج معالجے سمیت مختلف وجوہات کے سبب بھارت گئے تھے۔

قبل ازیں 16 اپریل کو 41 پاکستانیوں کی بھارت سے وطن واپسی ہوئی تھی۔

اس خبر پر اپنی رائے کا اظہار کریں

اپنا تبصرہ بھیجیں